Gaur egin da Bizkaiko Metalgintzako Hitzarmenaren negoziazio-mahaiaren bigarren bilera. Bertan, sektore osoarentzako aldarrikapen nagusiak jasotzen dituen bere plataforma aurkeztu du LABek.
Datozen hilabeteetan erabakiko dira sektoreko langileen lan-baldintzak, eta gogorarazi nahi dugu negoziazio hori hazkunde ekonomikoko eta enplegu asko sortzen ari den egoera batean egingo dela. Beraz, ez dago aitzakiarik hitzarmen honetan, sortutako aberastasunaren bidezko banaketa ez egoteko eta sektoreko langileen baldintzak ez duintzeko.
LABek bi urteko indarraldia duen plataforma bat aurkeztu du, honako aldarrikapen nagusiak jasotzen dituena:
Enplegua sortzea
Lanaldia murrizteko, errelebo-kontratua bermatzeko eta malgutasuna murriztu eta mugatzeko neurriak aurkeztu ditugu.
Aberastasunaren banaketa bidezkoa
KPIaren gaineko soldata-igoerak proposatzen ditugu, bai sektoreko hitzarmeneko tauletan, bai soldata errealetan. Patronalak sektoreko langile guztien eskulanari esker poltsikoratu duen aberastasuna banatzeko garaia da.
Enplegua duintzea
Azpikontratetako langileentzat lan duina izateko eskubidea aldarrikatzen dugu, azpikontratatutako jarduera guztietarako subrogazio-eskubidea, ABLEak desagertzea, gazteen kontratazioa duintzea (praktikak zein prestakuntza-kontratuak…). Aniztasun funtzionala duten langileek jasaten duten diskriminazioarekin eta prekarietatearekin amaitzeko neurriak jasotzen ditugu.
Lanean osasuna eta bizitza zaintzea
Gure osasuna erdigunean jartzeko unea da, bajetan hobekuntzak, prestakuntza, prebentzio-neurriak, lan-istripuengatiko kalte-ordainak. Hitzarmenean, lehen aldiz, amiantoarekiko neurriak ere kokatu nahi ditugu.
Hobekuntza sozialak
Hobekuntzak lizentzietan; zaintza-lana, guraso bakarreko familia-ereduak eta edoskitzea aitortzea, lizentziak lanegunetan hartzea lehen lanegunetik…
Edozein arrazoirengatik (sexua – generikoa, jatorria, kolektibo jakin bateko kide izateagatik…) diskriminazioa debekatzea
Kolektibo jakin bateko kide izateagatik ezein langilek edo langilek diskriminaziorik jasan ez dezan neurriak aurkeztu ditugu; izan ere, guztiok ditugu lan-munduan sartzeko eta parte hartzeko eskubide berberak.
Neurri feministak
Berdintasun-plan eraginkorrak eta benetakoak ahalbidetzen dituzten neurriak aurkezten ditugu. Emakumeok erdigunean jartzen gaituzten edukiak biltzen ditugu.
Lan-erreformaren aurkako neurriak
-Hitzarmenaren ultraaktibitea mugarik gabe luzatzea.
-Itundutakoa ez aplikatzea eragozten duten klausulak.
-Sektoreko lan-baldintzak bateratzea. Enpresetan ezingo lirateke negoziatu Bizkaiko Metalgintzako Hitzarmeneanezarritakoak baino lan-baldintza okerragoak.
-Bizkaiko hitzarmenak lehentasuna izango du estatukoaren aurrean.
Horiek dira LABen plataformak jasotzen dituen aldarrikapen nagusietako batzuk. sektoreko pertsonen lan- eta bizi- baldintzak duintzearen alde egiten dugu, eta, horretarako, badakigu gakoa langile guztiak antolatzea eta aktibatzea dela, eta hori izango da LABen egiteko nagusia datozen hilabeteetan.