LAB sindikatuak dei egiten du espainiar gobernuaren espetxe politika ankerra salatu eta euskal presoen etxeratzearen alde deitutako mobilizazioetan parte hartzera.
Euskal presoen eskubideen defentsaren kontrako operazio politiko-poliziala salatuz hasi genuen astea, eta gaur, Uribetxebarriaren heriotzarekin, espainiar zein frantziar Gobernuen espetxe politika ankerra salatuz amaitu behar dugu, euskal presoen giza eskubideak eta bizi baldintzak zuzenki erasotzen jarraitzen baitu.
Euskal presoek pairatzen duten egoera larria are zitalagoa bihurtzen da preso gaixoen kasuan. Gaur bereziki gogoan ditugu guztiak. Dispertsioaren ondorioez gain gaixotasuna behar bezala artatzeko baldintzarik eza pairatzen dute, muturrekoa da haien egoera, eta atzera bueltarik gabeak, egoeraren ondorioak.
LABen irudiko egunotako gertakari guztien atzean arrazoi nagusi bat dago: gatazkaren konponbidea zapuzteko espainiar Gobernuaren seta. Bere zigor eta mendeku grinak ez du mugarik. Normalkuntza politikoko aukera orori atea ixteko eginahalean erabaki politikoak daude, espetxe politika kriminala mantentzearena kasu. Euskal presoak konponbide prozesuaren kontra erabili nahi dituzte. Ez dago herri normalizaturik 500 preso politiko espetxean mantentzen diren bitartean.
Ez dago itxaroterik. Espainiar zein frantziar Gobernuen espetxe politika ankerraren amaiera behartzeko elkartasunetik konpromisoetara pasatu behar dugu. Lehenbailehen preso gaixoak aske eta presoak guztiak etxera bueltan behar ditugu.
LAB sindikatutik dei egiten dugu Uribetxeberria heriotzera eraman duen egoera salatu eta dispertsioarekin amaituz, euskal presoen eskubideen alde antolatuak diren mobilizazioetan parte hartzera.
Eskubide guztien jabe, euskal presoak etxean nahi ditugu eta horren alde lanean jarraituko dugu.