Jakin berri izan dugunez, Euskadiko Justizia Auzitegi Nagusiak ebatzi du Gipuzkoako Grafikagintzako sektore hitzarmenean 2021eko soldata igoerak %0,75 izan behar duela, KPI negatiboa izateagatik murrizketarik gabe. Gipuzkoako Grafikagintzako sektore hitzarmenean, 2021 urterako hitzartu zen soldata igoera aplikatzerakoan, Adegi patronalak KPI negatiboa zenez, ez zuen adostutako %0’75eko soldata igoera aplikatu nahi izan: KPI -%0’50ekoa izan zela argudiatuta %0’25eko igoera aplikatu nahi zuen. Gipuzkoako Grafikagintza sektorean adostu zena, KPIaren igoeraz gain, %0’75eko soldata igoera izan zen.
Hitzarmenean ordezkaritza dugun sindikatuetatik, soilik LABetik jo genuen epaitegira Adegiren erabakiarekin ados ez geundelako. Orain ebatzi den epaiak argi uzten du grafikagintzako langileek %0’75-eko soldata igoera edukitzeko eskubidea dutela, bere egin baititu aurkeztu genituen argudioak.
Oinarrizko produktuetan gertatzen ari den garestitze izugarriak direla eta, ezinbestekoa deritzogu bai ekintza sindikalean, zein negoziazio kolektiboan nahiz epaitegietan, aberastasunaren banaketaren alde egitea eta langileen eros ahalmena bermatzearen alde borrokatzea. LABek horretan jardungo du.