Atzerapenek eta taulen eguneratzeak %7ko igoera ekarriko dute, zeinak kutxazain kategoriarako, adibidez, 1.100 eurotik gorako soldata-taulen igoera ekarriko duen 2022rako.

Gaur, azaroak 30, LAB, CCOO, UGT, ELA eta CECOBIk aurreakordio bat sinatu dugu 2018ko amaieratik eguneratu gabe zegoen Bizkaiko elikagaien merkataritzako hitzarmenean.

Hitzarmena indarrean egongo da 2019tik 2022ra bitartean. 8.000 langile baino gehiagori eragiten dio, handizkako nahiz txikizkako banaketan. Kolektibo horiek funtsezkoak izan dira pandemian zehar, baina gauetik goizera bigarren maila batera igaro baziren ere, sektoreko borroka eta mobilizaziotik lortu dugu akordioa erdiestea.

LABek gainerako zentral sindikalekin eta CECOBIrekin sinatutako aurreakordioaren helburua izan da sektore feminizatua den elikagai-merkataritzaren lan baldintzak duintzea. LABek soldaten arloan egindako hasierako proposamena da patronalak akordiorako oinarritzat hartu duena. LABen proposamena kategoria goreneko soldata hartzea izan da, eta horren gainean kalkulatzea 2019tik 2021era bitarteko KPIen igoera. Ateratzen den azken zenbatekoa, linealki igoko zaie 20.000 eurotik beherako soldata duten kategoria guztiei. Aurreakordioaren arabera, taulen eguneratzeak, besteak beste, 1.100 eurotik gorako igoera ekarriko du saltzaile eta kutxazain kategorietarako.

LABek arreta berezia jarri du kategoria baxuenen lan baldintzak duintzeko. Horregatik, kategoria baxuenei soldata igoera handiagoa eman zaie, kategorien arteko aldeak areagotzea saihestuz eta, horrela, sektorean dagoen soldata arrakalari aurre eginez.

COVIDagatik inolako haborokinik eman ez duten enpresek 450 euro ordainduko dituzte, beti ere pasa den urteko aldiarekin konparatuz, 2020ko martxoaren 15etik abenduaren 31ra bitartean, enpresak diru-sarreretan %15eko igoera izan badu salmentengatik Bizkaian. Eta, beti ere, enpresak 2020ko ekitaldi horretan izan duen emaitza positiboa, zergak aplikatu aurretik, 2019ko ekitaldikoa baino handiagoa bada.

Antzinatasunari dagokionez, LABek ahal izan duen guztia egin du taulen eguneratzea berreskuratzeko, baina bidean bakarrik geratu garenez, gure aldarrikapenetako bat izango da hurrengo negoziazioan.

Aurreakordioa ez da izan arlo ekonomikoan bakarrik:

  • 2022tik aurrera, urtean 4 larunbat libre hartu ahal izango dira, oporretako larunbatak zenbatu gabe; orainarte, ez zegoen libre hartzeko larunbatik adostuta.
  • 2022rako lanaldia 1.727 ordukoa izango da, hau da, 4 orduko murrizketa.
  • Oporrak berdinak izango dira txikizkako enpresentzat, bai eta handizkakoentzat ere; azken horiek opor egun1 gehiago izango dute urtean, 31 egun maiatzetik irailera bitartean hartzeko.
  • Abenduaren 24ko eta 31ko itxierak berdin jarraitzen du, dendak 15:00etan eta hipermerkatuak 18:00etan.
  • Hemendik aurrera, ordu osagarriak dituzten langileek ordu horien %30 finkatzeko aukera izango duteurtearen amaieran. Horrela, elikagaien merkataritzan, kezkagarria bihurtzen ari zen egoera geldiarazten saiatu gara, eta aukera zabaltzen dugu lanaldi osora iritsi nahi duten pertsonei.

Aurreakordio hau sinatzeak ez du esan nahi negoziazio honen hasieran planteatutako helburu guztiak lortu ditugunik, baina LAB sindikatutik positiboki baloratzen dugu hitzarmena lortu izana. Uste dugu arreta berezia jartzen zaiela baldintza okerrenetan daudenei, eta, hurrengo negoziazioari begira, posizio onean uzten gaitu.

Azkenik, baina ez horregatik garrantzi gutxiagokoa, hiru urte hauetan bileretan eta batzarretan parte hartu duten sektoreko langileak zoriondu nahi ditugu, baita propaganda banatzeagatik, dendetan kartelak itsasteagatik, kontzentrazioetara joateagatik… Laburbilduz, negoziazio osoan izan duten jarrera aktiboagatik.

Helburu argiekin eta guztiok batera lan eginez, Bizkaiko elikagaien merkataritzaren sektoreko lan-baldintzak hobetu ditzakegula erakutsi dugu.