LAB SINDIKATUA

2017/12/14 :: 9:10

Azken Eguneraketa:2017/12/13 :: 15:55

HIZKUNTZA
Hemen zaude:

Prekarietatearen aurka aliantzak eraikitzeko deia luzatu dugu Durangon, Ekimen Ibiltariaren ekitaldi nagusian

E-posta Inprimatu PDF fitxategia
Partekatu albistea



"Lan duina, bizi duina" aldarriak Euskal Herriko hainbat txoko zeharkatu ditu urriaz geroztik, Iruñean abiatu genuen dinamikaren eskutik. Durangora iritsi da gaur, azken geltokira, baina borrokak aurrera jarraituko du, langile kolektibo guztiei babesa eskaintzeko konpromisoa berretsi baitugu, euren eskubideen defentsan. Hala adierazi du LABeko idazkari nagusi ondoko Igor Arroyok, Ekimen Ibiltariaren ekitaldi nagusian: "Lan duina eta bizi duina, horixe da gure bandera. Lan duina eta bizi duina, denontzat. Gizonentzat eta bereziki emakumeentzat. Edozein dela ere norberaren kolorea edo jatorria. Edozein dela norberaren gaitasun funtzionalak edo orientazio sexuala".

Kalejira batekin ekin diogu egunari, Ernai erakundearekin batera. Hain zuzen ere, gazteentzat izan ditu hitzak Arroyok, Landako Gunean egindako ekitaldian: "Prekarietatearen kontra, ekin diezaiogun elkarrekin. Aliantzak eraiki ditzagun. Eta guretzat aliantza garrantzitsua da LAB eta Ernairen artean garatu beharrekoa. LAB eta Ernai elkarrekin, borroka honetan aitzindari izan gaitezke". 



Ekimen Ibiltariarekin oso oinarrizko aldarrikapena zabaldu dugu eskualdez eskualde, bi hilabetetan zehar: pertsona orok, langile orok badu lan eta bizi duina izateko eskubidea, eta sindikatuok eskubide hori defendatzeko tresna izan behar dugu. "Sindikatuok ahalegin berezia egin behar dugu langile sektore guztiengana iristeko. Etxeko langileak eta ustezko autonomoak. Langabeak eta pentsiodunak. ETT bidezko langileak eta bekadunak. Badakigu hauetako askok sindikalismoa urruti sentitu izan dutela, orain arte. Guk zor historiko hori kitatu nahi dugu. Esan diegu, esan dizuegu: zuena da sindikatua. Har ezazue zuen eskuetan. Erabili ezazue, zanpatzen zaituen patroiari aurre egiteko. Erabili ezazue, beste aldera begiratzen
duten instituzioei neurriak har ditzaten exijitzeko", adierazi du Arroyok.

Nor bere aldetik ahula garela onartu du, baina elkarrekin boteretsuak garela nabarmendu du: Langileon botereaz, botere sindikalaz, prekarietatearen kontrako gerra abiatzera goaz".



Atera dugu gazteontzako lan eskubideen gida, salatu dugu lanbide heziketako praktiketan ematen den babesgabetasuna, prekarietatearen Argazki Nazionala egin eta argitaratzera goaz, eskualdez eskualde ekimenak antolatzera goaz... hainbat egitasmo ditugu esku artean, egungo errealitatea iraultzeko erronkarekin. "Kapitalismoan gutxiengo enpresarialaren etekinek dute lehentasuna. Horrela da munduko herrialde gehienetan. Horrela da Espainiako Estatuan ere. Gaurko egunez, argi eta garbi salatu behar dugu Espainiako Konstituzioaren itxurakeria. Lanerako eskubideaz mintzo da, baina lan esplotazioa ahalbidetzen du. Etxebizitzarako eskubidea aipatzen du, baina etxegabetzeak ahalbidetzen ditu. Hau ez da gure Konstituzioa, arrotza delako, Konstituzio inposatua delako eta langileon zanpaketa ahalbidetzen duen Konstituzioa delako", azpimarratu du LABeko idazkari nagusi ondokoak.

Arroyoren hitzetan, "guk sistema ekonomiko eta politikoari buelta eman nahi diogu. Erdigunean, enpresarien etekinen ordez, bizi eta lan duinerako eskubidea kokatu nahi dugu. Bizi eta lan duina bermatuko duen Euskal Errepublika eraiki nahi dugu. Eta horretara goaz", erantsi du.

Hala, Landako Guneko ekitaldian, prekarietatearen harresia eraitsi dugu modu sinbolikoan, langile kolektibo guztiak ikusgarri egiteko eta borrokarako deia zabaltzeko.