LAB SINDIKATUA

2018/04/25 :: 4:48

Azken Eguneraketa:2018/04/24 :: 13:16

HIZKUNTZA
Hemen zaude: NAZIOARTEA Elkartasuna Estatuaren errepresioa salatu dugu sindikatuok

Estatuaren errepresioa salatu dugu sindikatuok

E-posta Inprimatu PDF fitxategia
Partekatu albistea



LAB, ELA, Kataluniako Intersindical-CSC eta Galiziako CIG sindikatuok agerraldia egin dugu Santiagon.



I-CSC, ELA, LAB ETA CIG-EN KOMUNIKATU SINDIKALA:

Sinatzen dugun sindikatuok, Kataluniako (Intersindical-CSC), Euskal Herriko (ELA eta LAB) eta Galizako (CIG) langile-klasearen izenean, Espainiar Estatuko egoera politikoa dela eta, bereziki Katalunian, eta demokraziaren eta askatasunen aurka egiten ari diren erasoak ikusirik, honakoa adierazi nahi dugu:

Gaur Katalunian bizi den unea benetako salbuespen egoera politikoa da, estatuaren jokabide antidemokratikoa medio, ez dagoelarik zuzenbide estatu bati dagokion benetako botereen banaketarik, eta diktaduraren oinordeko izan zen 78ko erregimenaren aurpegirik zital eta erreakzionarioena agertzen ari delako.

2017ko urriaren 1etik hona izan diren gertakariek agerian uzten dute erregimen autoritario eta antidemokratiko honen noraeza: esku hartze poliziala, bozkatzeko eskubide demokratikoa gauzatu nahi izan zuten herritarren aurkako errepresioa eta bortizkeria, esku hartze politikoa Konstituzioaren 155. artikuluaren aplikazioaren bidez, jazarpen polizial eta judiziala, inputazioak, hautetsi instituzional demokratiko eta mugimendu sozialen buruen atxiloketa eta espetxeratzea, beste lider batzuen erbesteratzea, Kataluniako Parlamentuak Generalitateko presidentetarako hautagaiak izendatzeko debekua, Mossoen arduraduna matxinadagatik auziperatzea... eta areago, jendarte katalanaren protesta eta mobilizazio zilegiaren kriminalizazioa, CDRetako kideak atxilotu dituztelarik, hauetako batzuri matxinada eta terrorismo delitua leporatu zaielarik.

Llarenak emandako euroaginduari erbesteratuak dauden europar herrialdeetako auzitegiek emandako erantzunak erakutsi du haiek ez dituztela egin leporatu zaizkien delituak, eta Espainiar Estatua nahiz beronen izenean diharduten erakunde judizialak bortxatzen ari direla bide baketsu eta demokratikoetatik defenditzen ari diren eskubideak -banako zein kolektiboak-, manifestazioetan ez delarik bortizkeriarik izan.

Arbuiatu egiten ditugu PPren gobernu ustel eta faxista PSOEren eta Ciudadanosen babes eta laguntzaz egiten ari den politikak, baina halaber deitoratu egiten ditugu erdibideko posizioak, zeintzuk egoera ikusita ez ditugun ulertzen ezkerreko indarren aldetik, ez soilik funtsean estatuaren egintza errepresiboak ontzat ematen dituztelako, baizik prozesu honek zalantzan jartzen dituelako, modu baketsu, zibiko eta demokratikoan, monarkia autoritario honen benetako izaera.

Honek agerian uzten du erregimen honen jopuntuan daudela emantzipazio prozesu herrikoi eta demokratikoak, eta gure herrien askapenaren aldeko borrokan dihardugun organizazio politiko eta sozialak nahiz mugimenduak. Argi geratu da Espainiar Estatuaren ereduak porrot egin duela eta estatua ezinean ari dela eutsi nahian eredu horri: zentralista, koroaren moduko instituzio anakronikoak dituena eta herrien autodeterminazio eskubide zilegiari erasotzeko indarraz eta errepresioaz baliatzen dena. Haatik, herriok hezten saiatu arren, beren zerbitzura dauden hedabideak baliatuagatik ere errealitate plurinazionala ukatzen duen Espainia uniformearen diskurtsoa hedatzeko, ez diegu uko egingo nazio garen aldetik zor zaizkigun eskubideei.

Gure ustez Estatuaren makineria errepresiboa aspaldidanik ari da bere izaera antidemokratikoa agertzen. Oinarrizko eskubideak eremu guztietan ari dira urratzen: Tabernako borroka batean nahastuta zeuden Altsasuko gazteei terrorismoa leporatu diete, hedabideak itxi egin dituzte, antolakunde politikoak ilegalizatu, sindikalistak espetxeratu mobilizazioetan parte hartzeagatik, greba eskubidea zalantzan jartzeko saioak (esaterako, horixe da hona ekarri gaituen Kataluniako Intersindical-CSCren ksaua, edota Galizan Navantiako CIGen aurkako demanda, Carlos eta Serafinei sektoreko greba batean parte hartu zutelako ezarritako espetxe zigorra), raperoen aurkako zigorrak, umoregile inputatuak, bertan behera uzteko mehatxupean dauden antzezlan kritikoak, kazetari kritikoei ezarritako betoa, lider independisten aurkako enbargo eta auziperatzeak... egunero protesta eta ideia desberdinen aurka urrats berriren bat egiten dute; aitzitik, agertu diren talde faxistak erabateko inpunitatez ari dira.

Esaten ziguten bide baketsu eta demokratikoetatik idieia eta proiektu politiko oro zela zilegi eta defenditzeko moduko, baina agerian ari da geratzen ez dela egia.

Horregatik honakoa galdegiten dugu:

• Urriaren 1eko erreferendumean eta abenduaren 21eko hauteskundeetan herri katalanak hautestontzietan adierazi zuen normaltasun demokratikoa bere onera ekar dezatela, hartara lehenik 155. artikuluaren aplikazioa indargabetuz.
• Puigdemont presidentearen eta preso politiko katalan guztien askatasuna.
• Erbesteratuen itzulera eta beren eskubide guztien berreskurapena.
• Hautetsiek pairatzen duten jazarpen polizial eta judiziala amaitzea.
• Espainiar estatuko herriek beren etorkizuna erabakitzeko duten eskubidea aitortzea, autodeterminazio eskubidea gauzatuz.

Azkenik, errepresaliatu guztiekiko elkartasuna adierazi nahi dugu, baita orohar Kataluniako herriarekiko. Eta dei egiten diegu gure herrikideei elkartasuna adieraz dezaten, eskubide hauen eta demokraziaren aldeko ekintza baketsu guztietan parte hartuz.

 


 
 

Ez dago iruzkinik


Iruzkinak egiteko izena ematea ezinbestekoa da. Oraindik ez duzu konturik? Erregistratu