LAB SINDIKATUA

2018/01/22 :: 22:38

Azken Eguneraketa:2018/01/22 :: 13:30

HIZKUNTZA
Hemen zaude: FEDERAZIOAK ZERBITZU PRIBATUAK Elikagaigintza Enplegu finko eta duinaren defentsan irten dira kalera Artiach-eko langileak

Enplegu finko eta duinaren defentsan irten dira kalera Artiach-eko langileak

E-posta Inprimatu PDF fitxategia
Partekatu albistea



Azaroan Lan-arloko Epaitegiko epaileak bidegabekotzat jo zuen Adams Food-ek kontratu-azkentze baten bitartez ezkutatu nahi izan zuen langile baten kaleratzea. Enpresaren jokamoldea salatzeko eta Artiach lantegian ematen den behin-behinekotasun handiari irtenbide bat emateko, eta, honekin batera, enplegu egoera egonkorra sustatzeko, manifestazio bat egin dute gaur langileek Bilbon.

Bizi proiektu duin eta egonkor bat bermatuko duen enplegu baten alde egiten du Artiach-eko enpresa batzordeak, eta hala aldarrikatu du gaurko mobilizazioan, "Enplegu finko eta duina. Despidorik ez, prekarietaterik ez!" leloarekin.

LABeko idazkari nagusi Garbiñe Aranburu manifestazioan izan da, enpresa batzordeak mobilizazioan parte hartzeko egindako deiarekin bat eginez.

Hau da Artiach-eko enpresa batzordeak manifestazioaren bukaeran, Eusko Jaurlaritzaren egoitzaren aurrean, irakurritakoa:

Artiacheko langileok enplegu finkoa suntsitzen duen politika eta lan munduko prekarietatea salatu nahi ditugu. Gaur, mobilizazio honen bidez, Confebask arbuiatu nahi dugu. Berak dauka enplegu finkoaren desagertzearen ardura, behin-behineko kontratuez ordezkatuz eta ondorioz, langileon bizitzan zeharo eragiten, langileon bizitza egitasmoak garatzeko aukerak itxiz. Eta Eusko Jaurlaritzaren aurrean amaitu dugu.

Eusko Jaurlaritzak bizkarra ematen die langileei, bere politikak kapitalaren alde jotzen du eta langileon baldintzak kaxkartzera bultzatzen du, lan baldintzak nahiz bizitza baldintzak. Beren kanpainekin EAEren egoera ekonomikoak onera jo duela adierazi arren ere, beren aurrekontuek eta politikak ez dute herritarren eta langileon alde egiten. Herri honen gehiengoari begirako politikak egiten dituztela goraipatzen dute baina danok dakigu ez dala egia: Patronalarekiko itunak, murrizketak, lan erreforma ontzat jotzea, herrialdeko itunen kaltean...eta neurri amaigabe baten zerrendak aditzera ematen digu EAEn bizi garen pertsonen bizi baldintzak babesteko inolako neurri eraginkorrik ez dutela hartzen, aldiz, beren politikek patronalaren egitasmoak asetzen dituzte, gogotik ase ere eta prekarietatea betikotzen dute.

Behin-behinekotasunaren datuak ondotxo ezagutzen dituzte... inork baino hobeto ezagutu ere! Langile askoren txirotasun egoera inork baino hobeto ezagutzen dute; ETTek jezartzen duten esklabutza egoera inork baino hobeto ezagutzen dute; egunero-egunero burutzen diren ehunaka banakako lan kanporaketa inork baino hobeto ezagutzen dituzte...eta honen aurrean ze motako erantzuna jasotzen dugu beraien partez? Confebasken onura baizik bilatzen ez duten aurrekontuak aprobatu dituzte.

Eusko Jaurlaritzari galdegiten diogu: pertsonen bizitza egonkortzen duten neurriak har ditzan eta langileok txirotasunera bultzatzen duten neurriak bazter ditzan. Lan kanporaketen aurrean 0 tolerantzia, azpikontratazio bazter uzten duten politikak bultzatu, ETTrik ez, enplegu duin eta finkoaren aldeko neurri errealak behar ditugu.

Hau dela medio, ibilitako bidea ezibiltzera gonbidatu nahi dugu Eusko Jaurlaritza. Langileon alde legezta dezala eta merkatu eta patronalen interesetatik aldendu dadila.

Eta bukatzeko, Galletas Artiacheko langileok hona hurbildu zareten langile guztion presentzia eskertu nahi dugu. Gutako bakoitzak gure enpresetan piztu ditugun borroka ezberdinen bidez prekarietatearekin bukatzeko prest gaude, bide hortatik segi dezazuen animatu nahi zaituztegu. Gure batasunaz, antolakuntzaz lehenets araziko ditugu gure lan eta bizi baldintzak kapitalaren interesen kaltean.

 


 
 

Ez dago iruzkinik


Iruzkinak egiteko izena ematea ezinbestekoa da. Oraindik ez duzu konturik? Erregistratu