LAB SINDIKATUA

2018/12/10 :: 11:27

Azken Eguneraketa:2018/12/10 :: 8:53

HIZKUNTZA
Hemen zaude: ARLOAK EUSKARA Euskararen normalizazioa Eskola jangeletako GASCA enpresako langileentzat gaur ireki dute euskara ikastaroetan izena emateko epea

Eskola jangeletako GASCA enpresako langileentzat gaur ireki dute euskara ikastaroetan izena emateko epea

E-posta Inprimatu PDF fitxategia
Partekatu albistea
Ordu gutxi falta dira Euskaraldia amaitzeko, Euskararen Nazioarteko Egunaren etorrerarekin, baina honek ez du esan nahi ezer bukatu denik. Hain zuzen ere, LAB bere ekarpena egiten ari da lan mundua euskalduntzeko, zenbait enpresatan lortutako akordioak adibide. Horietako enpresa batean, eskola jangeletako Gascan, gaur bertan ireki dute bertako langileek euskara ikastaroetan izena emateko epea.

Eskola jangeletako GASCA enpresan langile guztiak euskalduntzeko akordioa lortu zen iaz. Aurten, bigarren urtez benetako eta doako sarbidea dute langileek euskara ikastaroetara. Gure borondatea, akordio hau etorkizunean mantentzea da.

Akordioa, enpresak eta AEKk sinatu zuten euren arten, gure laguntzarekin eta aurten berriz aurrera eraman dugu. Langileek, ikastaroen beharrizanetara gehien egokitzen den euskaltegian jasoko dituzte klaseak, goizez edo arratsaldez, ikasleen zein euskaltegiaren aukeren arabera.

Aurten, alde batetik, A1 mailako ikastaroak egongo dira, 60 ordutakoak, astean bi egunetan. Bestalde, A2, B1, B2 eta C1 mailetakoak, 120 ordutakoak, astean hiru egunetan. %75eko asistentzia eskatzen da ikastaroetan.

Iaz, 110 langilek hartu zuten parte ikastaroetan Bizkaian. Aurtengoari dagokionez, gaur hasi da izena emateko epea eta abenduaren 14ra arte luzatuko da. Gainera, Arabako langileei ere zabaldu zaie aukera. Aurten erdietsitako beste lorpen bat izan da, langileek ikastaroa gainditzen badute, maiatzean edo ekainean HABEko azterketara aurkezteko aukera izango dutela.

Auzo Lagun-en ere
GASCAkoa ez da langileei euskarazko klaseak emateko lortu den akordio bakarra. Jangeletako beste enpresa batean, Gipuzkoako Auzo Lagun-en, horrela eskatzen duten langileei euskara klaseak ordainduko dizkie enpresak, astean lau ordutakoak. Gipuzkoako kudeaketa zuzenean ere euskara ikastaroak enpresak ordainduko ditu, astean bost ordutakoak.
 


 
 

Gure zerbitzuak hobetzeko, gure eta hirugarrenen cookieak erabiltzen ditugu, eta iraunkorrak direnez, erabiltzaileei buruzko estatistikak ematen dizkigute. Nabigatzen jarraitzen baduzu, cookie horiek erabiltzea onartzen duzu.

Informazio gehiago hemen.

Pribatutasun politika / Política de privacidad
.